Parlamentuaren osoko bilkurak ebazpen bat onetsi du gaur PSNren, EH Bilduren, Geroa Bairen eta Contigo-Zurekinen aldeko botoekin, UPNren abstentzioarekin eta PPN eta Voxek aurkako botoekin, zeinaren bidez Nafarroako Gobernua eta Osasun Departamentua premiatzen baitira “Osasunbidea-Nafarroako Osasun Zerbitzuaren 2025erako lan publikoaren eskaintzan jaso daitezen egonkortze prozesuan hutsik geratu diren lanpostu guztiak, horrela jasotzen baita uztailaren 1eko Foru Legean, Nafarroako administrazio publikoetan enplegu publikoan aldibaterakotasuna murrizteko presako neurriei buruzko abenduaren 28ko 20/2021 Legetik eratorritako egonkortze prozesuak egiteko neurriei buruzkoan, bosgarren xedapen gehigarrian, eta halaber jaso daitezen Osasunbidea-Nafarroako Osasun Zerbitzuaren egiturazko lanpostu hutsak, behin-behinekotasuna % 8ra murrizteko helburuarekin”.

Onetsitako ebazpenak bigarren atalean Nafarroako Gobernuari eta Osasun Departamentuari eskatzen die “sei hilabeteko epean langileen ordezkariekin negozia dezan aldaketa bat egitea 347/1993 Foru Dekretuan eta garatzeko foru aginduetan, O-NOZen sartzeari eta lanpostuak betetzeari buruzkoetan, honako helburu hauekin: hautaprozesuak arintzea ebazteko denborak murriztuz, lanpostu betegaitzetan emandako denbora baloratzea eta haiek definitzea, merezimenduen baremazioa sinplifikatzea eta indarrean dagoen legediari jarraiki jendea Nafarroako bi hizkuntzetan artatzea lehentasuneko helburu gisa bermatzea”. Atal honen alde bozkatu dute PSNk, EH Bilduk, Geroa Baik eta Contigo-Zurekinek eta UPNk, PPNk eta Voxek, berriz, aurka.

Azken ñabardura, indarrean dagoen legediari dagokiona, PSNk aurkeztutako eta EH Bilduk, ekimenaren titularrak, onartutako gehitzeko zuzenketa in voce batetik abiatuta gehitu da.

Zioen azalpenean, EH Bildu talde parlamentarioak sustatutako ebazpenak Osasunbideak jasaten duen behin-behinekotasun-tasa handiari lotutako "prekarietateari" buruz ohartarazi du, "Foru Administrazio osoan altuena baita, % 60tik gorakoa", eta plantillak egonkortzeari ekiteko deia egin du, finkotasun-prozesutik harago, Europako mandatuaren eta eman dituen epaien ondorioz, 19/2022 Foru Legearen babesean egiten ari baitira, eta horrek lanpostuen "heren bat" baino ez baitu beteko.

Aldi berean, "motel eta konplexutzat” jotzen da Osasunbideako lanpostuetan sartzeko eta hauek betetzeko Erregelamendua, merezimenduen balorazioa barne, merkataritza-prozedura bati – "lehiatzeko puntuak erosteari" buruz hitz egiten da – gehiago dagokiolako bikaintasunari lotutako prestakuntza eta jarduera bati buruz baino.

Horren ondorioz, proposamena egin duenak 347/1993 Foru Dekretua eta hura garatzeko foru-aginduak sindikatuen ordezkariekin berriz negoziatzeko deia egin du, deialdien ebazpena atzeratu ez dadin, egungo araudiak "ez baitu lagundu behin-behinekotasuna murrizten, guztiz kontrakoa baizik".

• www.nafarroakoparlamentua.eus
• Publicación de la moción (BOPN, n.º 53, de 16-04-2024)