1. Azala
  2. Nafarroako Parlamentua premiatzen da azterlan bat agin diezaion Errealitate Sozialaren Behatokiari adinekoen beharrizanak eta eskariak ezagutzeko
Noiz argitaratua Osteguna, 2021.eko Martxoak 18

Nafarroako Parlamentua premiatzen da azterlan bat agin diezaion Errealitate Sozialaren Behatokiari adinekoen beharrizanak eta eskariak ezagutzeko

Zerbitzu publikoak hobetzea eta zabaltzea proposatzen da eremu pribatutik kanpoko zaintzak ziurtatzeko

Parlamentuaren osoko bilkurak ebazpen bat onetsi du gaur PSNren, Geroa Bairen, EH Bilduren, Podemos-Ahal Duguren eta I-Eren aldeko botoekin eta Navarra Sumaren abstentzioarekin, zeinaren bidez Nafarroako Gobernua premiatzen baita “azterlan bat egiteko agin diezaion Errealitate Sozialaren Behatokiari, Nafarroan bizi diren adinekoen beharrizanak eta eskariak ezagutzeko”.

 

Onetsitako ebazpenak bigarren atalean Foru Exekutiboari eskatzen dio aho batez “Adinekoen Kontseiluari protagonismo handiagoa eman diezaion eta parte hartzeko mekanismo gehiago ezar ditzan, adindunek beren eskariak helaraztea eta protagonista aktiboak izatea ahalbidetze aldera”.

 

Azkenik, hirugarren atalean, Foru Gobernua premiatzen da “plan bat presta dezan, etxez etxeko laguntza zerbitzua indartzeko, prebentzio eta zahartze aktiborako programak zabaltzeko eta zerbitzu publiko berriak sortzeko, hala nola familiako etxeak eta etxebizitza babestuak, arreta integralagoa eskainiko dutenak eta egungo zerbitzuak hobetzera joko dutenak”. Navarra Sumak atal honen aurkako botoa eman du.

 

Zioen azalpenean, EH Bildu talde parlamentarioak sustatutako ebazpenak dio, adin talde honen aniztasuna kontuan hartuta, arreta integrala bermatzeko kalitatezko zerbitzu publikoak behar direla, izan ere, Espainan adinduen % 87,3k beren etxebizitzetan gelditu nahi dute, baita mendekotasuna agertzen bada ere (%78).

 

Nafarroan bizi diren adinduen eskaerak eta beharrizanak identifikatzeko, beharrezkoa da diagnostiko bat egitea, "zerbitzu publikoak birbideratzen, hobetzen eta zabaltzen laguntzeko", eta dagozkion tresnak eratu behar dira “parte hartze aktiboa izan dezaten eta haiengan eragiten duten politika publikoak prestatzeko ekarpena aurkez dezaten”.

 

Amaitzeko, sustatzaileak Nazio Batuen 1991ko Biltzar Nagusian onetsitako Nazio Batuen adinduen aldeko printzipioak aipatzen ditu, azpimarratuz “garrantzizkoa dela pertsona horien independentzia, parte hartzea, zaintza, norbere burua errealizatzea eta duintasuna bermatzea”.