Parlamentuaren osoko bilkurak ebazpen bat onetsi du gaur UPNren, PSNren, EH Bilduren, Geroa Bairen eta Contigo-Zurekinen aldeko botoekin eta PPNren eta Voxen aurkako botoekin, zeinaren bidez Nafarroako Gobernua premiatzen baita “toki administrazioaren arloan dauzkagun eskumen historikoak aldeztu ditzan, Nafarroako toki-entitateek ez dezaten kalterik izan eta beren baliabideak eduki ahal izan ditzaten beren eskumen-esparruko politika publikoak garatzeko”.

Zioen azalpenean, Geroa Bai talde parlamentarioak sustatutako ebazpenak Nafarroak Toki Administrazioaren arloan dituen eskumen historikoak aipatzen ditu, ekitaldi honetarako eta hurrengo bietarako agindutako defizit-helburuagatik emandako maniobra-marjina gehigarria aldarrikatzeko. Horrela, Kontuen Ganberaren azken txostenaren arabera "egoera ona" duten toki entitateek "gizarte politiketan inbertitzeko ahaleginari" eutsi ahal izango diote.

Horri dagokionez, Senatuak Espainiako Gobernuak proposatutako defizitaren bideari uko egin ondoren (2023rako Europako Batzordeak bermatu zituen helburuak mantentzen dira) indarrean dauden zorren mugen banaketa "desorekatua" dela adierazi da, eta EBko Egonkortasun eta Hazkunderako Itunean jasotako eskakizunak (lau urtean defizita 7 puntutan murriztea) toki-erakundeen (% 0,2ko superabita izatera behartuta) eta autonomia-erkidegoen (% 0,1 defizit-helburua bete behar dute) kontura direla azpimarratu da.

Ogasun Ministerioaren kalkuluen arabera, 2023ko parametroak berreskuratzeak, estatu mailan, udalentzako politika publikoetan inbertitzeko 2.924 milioiko gaitasun fiskala galtzea dakar (% 0tik +% 2ra pasa dira). Autonomia-erkidegoen kasuan, marjina horren murrizketa (- % 0,1) 1.456 milioikoa da.

Aplikatuko diren zenbatekoen arabera, estatuko administrazio publikoen defizit-helburua berriz ere % 3koa izanen da 2024an.

• www.nafarroakoparlamentua.eus
• Mozioa (48. NPAO, 2024-03-27koa)